Erfiður leikur bíður U21 árs landsliðs karla í knattspyrnu í kvöld en þá mætir það Spánverjum í undankeppni EM og fer leikurinn fram í Murcia.
Þetta verður fjórði leikur íslenska liðsins í riðlinum. Það tapaði fyrsta leiknum á heimavelli gegn Albönum, 3:2. Í öðrum leiknum fögnuðu íslensku strákarnir 2:0 útisigri gegn Slóvökum og gerðu svo markalaust jafntefli á útivelli gegn Albönum.
Spánverjar hafa unnið báða leiki sína. Þeir lögðu Eista á útivelli, 1:0, og Slóvaka á útivelli, 4:1.
Samúel Kári Friðjónsson, leikmaður norska úrvalsdeildarliðsins Vålerenga, tekur út leikbann í kvöld en hann verður klár í slaginn á þriðjudaginn þegar Íslendingar sækja Eista heim.