Knattspyrnusamband Evrópu hefur ákveðið að sekta rússneska knattspyrnusambandið um 120.000 evrur, jafnvirði tæplega 20 milljóna króna, vegna óláta áhangenda rússneska liðsins á meðan á leik þess við Tékka í Evrópumótinu á föstudag stóð.
Þá verða sex stig tekin af Rússlandi í undankeppni Evrópumótsins 2016 ef ólæti rússneskra stuðningsmanna endurtaka sig á einhverjum tímapunkti fram yfir undankeppnina.
Í tilkynningu UEFA segir að rússneska knattspyrnusambandið sé ábyrgt fyrir stuðningsmönnunum sem hafi meðal annars kveikt í flugeldum og haldið á lofti ósæmilegum fánum, á meðan á leiknum við Tékka stóð á föstudag.
Rússar hafa þrjá daga til að áfrýja úrskurðinum.