Landsliðsmaðurinn Rúnar Már Sigurjónsson, sem leikur með Sundsvall í efstu deild sænska fótboltans, er eftirsóttur af mörgum liðum.
Þrátt fyrir að hafa ekki spilað mínútu með íslenska landsliðinu á Evrópumótinu í knattspyrnu er Rúnar, sem skorað hefur sex mörk í 12 leikjum fyrir Sundsvall á tímabilinu, samkvæmt Sundsvalls Tidning eftirsóttur af ýmsum liðum, þar á meðal svissneska úrvalsdeildarliðinu Grasshopper, þar sem sænski miðjumaðurinn Kim Källström leikur.
Grasshopper er sigursælasta félag í sögu Sviss og hefur unnið deildina 27 sinnum og bikarinn 19 sinnum.
„Ég get staðfest að það er áhugi fyrir Rúnari og að við erum í viðræðum. En ég get ekki sagt hvaða félög um ræðir,“ sagði Urban Hagblom, yfirmaður íþróttamála hjá Sundsvall.
Leikar hefjast á ný í sænsku deildinni hinn 10. júlí en samningur Rúnars er til loka þessa tímabils. Búnar eru 12 umferðir af 30.