Spánn og England eru komin í átta liða úrslit Evrópumótsins í knattspyrnu kvenna eftir leiki kvöldsins. Spánn, Skotland og Portúgal enduðu öll með þrjú stig í D-riðlinum en spænska liðið er með hagstæðustu markatöluna og fer því áfram.
Skotland vann óvæntan sigur á Spánverjum, 1:0. Caroline Weir skoraði sigurmark Skota undir lok fyrri hálfleiks en það dugði ekki til að komast áfram.
England hafði svo betur gegn Portúgal, 2:1, þrátt fyrir að gera tíu breytingar á byrjunarliði sínu frá síðasta leik. Toni Duggan kom enska liðinu yfir á sjöundu mínútu en Carolina Mendes, leikmaður Grindavíkur, jafnaði tíu mínútum síðar. Nikita Parris skoraði svo sigurmark Englendinga á 48. mínútu.
Enska liðið mætir því franska í átta liða úrslitum og Spánn mætir Austurríki.