Benítez: Gerðum allt nema skora

Rafael Benítez, knattspyrnustjóri Liverpool, sagði að það væri ekki hægt að gagnrýna leikmenn sína fyrir neitt í leiknum við Manchester City í dag, nema það að þeir skyldu ekki skora mörk.

Leikurinn endaði 0:0 þrátt fyrir þunga sókn Liverpool í síðari hálfleik og á köflum skothríð að marki Manchester City. Liverpool tókst því ekki að saxa á forskot þriggja efstu liða deildarinnar.

„Þetta var góður leikur, liðið spilaði mjög vel, skapaði sér færi og miðað við þau hefðum við átt að vinna, en það gekk ekki upp í dag. Markvörðurinn þeirra og varnarmennirnir áttu mjög góðan leik og þetta var ekki auðvelt því City hefur náð glæsilegum árangri á heimavelli.

Það er eiginlega ekki hægt að gagnrýna leikmennina því þeir lögðu afar hart að sér og sköpuðu sér góð marktækifæri. Svona er fótboltinn, við verðum að halda áfram, spila á þennan hátt og nýta færin betur," sagði Benítez við Sky Sports.

Hann var spurður hvort Liverpool myndi kaupa leikmenn í janúar. „Við erum með menn í sigtinu og peningar eru ekki vandamálið. Ég held að við munum kaupa þá menn sem við þurfum, kannski einn, kannski tvo, og það er á næstu grösum," sagði Benítez.

• 2 blogg um fréttina

Bloggað um fréttina

• Óskar Þorkelsson: Leikurinn í dag
• Snorri Bergz: Um það snýst leikurinn kallinn