Chelsea hefur spilað 84 leiki í röð án taps á heimavelli í deildinni

Sannkallaður stórleikur er á dagskrá í ensku úrvalsdeildinni á sunnudaginn þegar Englands- og Evrópumeistarar Manchester United sækja Chelsea heim á Stamford Bridge. Chelsea hefur ekki tapað leik í úrvalsdeildinni á þessu ári, eitt liða, og árangur Chelsea á heimavelli í úrvalsdeildinni er hreint magnaður.

Chelsea hefur ekki tapað á heimavelli í ensku úrvalsdeildinni í 84 leikjum í röð eða í fjögur og hálft ár en síðasta liðið til að leggja Chelsea að velli á Stamford Bridge var Arsenal í febrúarmánuði 2004.

Chelsea er ósigrað í síðustu 25 leikjum í úrvalsdeildinni en síðasti ósigur liðsins leit dagsins ljós í desember í fyrra þegar liðið tapaði, 1:0, fyrir Arsenal á Emirates Stadium. Á þessu ári hefur Chelsea leikið 22 leiki í úrvalsdeildinni. Liðið hefur unnið 16 þeirra og gert 6 jafntefli.

Chelsea verður án Michael Essien sem í vikunni gekkst undir aðgerð á hné.

Manchester United hefur hikstað nokkuð í upphafi leiktíðarinnar og tapi liðið á sunnudaginn jafnar liðið slökustu byrjun sína frá stofnun úrvalsdeildarinnar. United hefur tapað 10 leikjum á móti Chelsea í úrvalsdeildinni, fleiri en á móti nokkru öðru liði.

Manchester United hefur 4 stig eftir fyrstu þrjá leiki sína í deildinni og ekkert lið í deildinni hefur skorað færri mörk en meistararnir hafa einungis skorað þrjú mörk.

Manchester United fagnaði síðast sigri á Stamford Bridge í apríl 2002. United vann þá 3:0 með mörkum frá Paul Scholes, Ruud van Nistelrooy og Ole Gunnari Solskjær.

Nemanja Vidic tekur út leikbann hjá United og þá er Michael Carrick frá vegna meiðsla.

• 3 blogg um fréttina

Bloggað um fréttina

• Skeggi: 85?
• Gísli Foster Hjartarson: Styttist í tapið
• Hafsteinn Viðar Ásgeirsson: En nú er vonandi komið að því.