Adebayor fékk ekki merki frá Guði

Sóknarmaðurinn Emmanuel Adebayor yfirgaf ekki enska knattspyrnufélagið Tottenham áður en félagskiptaglugginn lokaði vegna þess að hann fékk ekki merki frá Guði þess efnis. Þetta kemur fram í frétt The Telegraph.

Framtíð Tógómannsins er í lausu lofti en Mauricio Pochettino, knattspyrnustjóri Tottenham, lætur hann æfa með U-21 árs liðinu og segir að hann muni aldrei aftur leika fyrir aðallið Tottenham. 

Adebayor á að hafa skrifað undir ógildingu á samningi sínum við Tottenham í gær og leit þá allt út fyrir að hann myndi ganga til liðs við Aston Villa. Honum snérist hins vegar hugur á síðustu stundu og verður þar með áfram í herbúðum Tottenham, án þess þó að spila fótbolta.

Það leit út fyrir að Adebayor myndi ganga til liðs við Aston Villa í lok júlí en hann hætti við það á síðustu stundu. Hann ráðfærði sig við prestinn sinn á þeim tíma og ákvað að flytja ekki frá London til Birmingham.

Það er því líklegt að Adebayor spili ekki mínútu með Tottenham fram í janúar og fái 100.000 pund á viku fyrir. Síðan verður að koma í ljós hvort hann hugsi sér til hreyfings þegar félagskiptaglugginn opnar aftur á nýju ári.

• Blogga um frétt