„Van Gaal er óþokki“

Mexíkóska knattspyrnugöðsögnin Hugo Sánchez er afar ósáttur við það hvernig Louis van Gaal, knattspyrnustjóri Manchester United, kom fram við Javier Hernández, Chicha­rito. Mexíkóski sóknarmaðurinn var seldur frá United til Bayer Le­verku­sen í Þýskalandi.

„Van Gaal tók slæma ákvörðun og það er ekki í fyrsta skipti sem hann gerir það, þetta er í 50.000 skiptið sem hann gerir þetta. Ég var sjálfur knattspyrnustjóri og svona á maður ekki að hegða sér gagnvart leikmönnum,“ sagði Sánchez við spænska blaðið Marca.

Athygli vakti þegar Chicha­rito klúðraði vítaspyrnu fyrir United í umspili Meistaradeildar Evrópu gegn Club Brugge. United var með örugga forystu en van Gaal sendi aðstoðarmanni sínum, Ryan Giggs, illt augnaráð þegar Chicha­rito skaut framhjá af vítapunktinum.

„Ég hefði komið, hrósað honum og sagt að ég hefði enn trú á honum. En augnaráðið sem van Gaal sendi Giggs; hann er óþverri. Það verður að koma fram við leikmenn eins og manneskjur,“ sagði Sánchez.

• Blogga um frétt