Wenger ætlar ekki að versla í janúar

Arsene Wenger knattspyrnustjóri Arsenal segir að hans menn ætli ekki að kaupa leikmenn þegar janúarglugginn opnar og hægt verður að kaupa menn á nýjan leik. Þrátt fyrir meiðsli lykilmanna og slæmt 4:0 tap gegn Southampton í gær séu nýir leikmenn ekki væntanlegir.

„Maður fær alltaf þessa spurningu, hvort það eigi að kaupa einhverja. Margir leikmanna okkar eru meiddir og snúa fljótlega aftur á völlinn,“ sagði Wenger þegar hann var spurður hvort einhver ný andlit myndu bætast í leikmannahóp Arsenal í janúar.

„Kaupa, kaupa, kaupa, kaupa er eina lausnin sem fólk virðist sjá,“ bætti Wenger við. Lykilmenn eins og Alexis Sánchez, Santi Cazorla, Francis Coquelin, Jack Wilshere og Danny Welbeck eru allir á sjúkralistanum hjá þeim rauðklæddu sem eru í öðru sæti ensku úrvalsdeildarinnar.

Orðrómur hefur verið um að Arsenal sé við það að krækja í Egyptann Mohamed Elneny, sem leikur með Birki Bjarnasyni hjá Basel. Elneny myndi einungis kosta fimm milljónir punda en Wenger var fljótur að neita þeim sögusögnum.

• Blogga um frétt