Eden Hazard, leikmaður Chelsea, tjáði sig um það í viðtali við Guardian á dögunum að hann hafi sent Jose Mourinho, fyrrum knattspyrnustjóra sínum hjá Chelsea skilaboð í kjölfar þess að Portúgalanum var sagt upp störfum hjá Englandsmeisturunum.
Hazard segir að í skilaboðinu hafi hann beðið Mourinho afsökunar á slæmri frammistöðu sinni í leikjum Chelsea í upphafi tímabilsins. Hazard var valinn leikmaður ársins eftir að hafa leikið afar vel með Chelsea sem varð Englandsmeistari á síðasta keppnistímabili.
Hazard náði hins vegar ekki að fylgja eftir þeirri frammistöðu sinni í upphafi yfirstandandi keppnistímabils og honum þykir leitt að frammistaða sín hafi átt þátt í því að Mourinho hafi misst starf sitt hjá Chelsea.
„Ég er með samviskubit þar sem ég náði ekki að fylgja eftir góðri frammistöðu minni á síðasta keppnistímabili. Ég hafði verið sá leikmaður sem réði úrslitum í nokkrum leikjum, en ég lék illa í upphafi leiktíðarinnar og okkur gekk ekki jafn vel í upphafi leiktíðarinnar,,“ sagði Hazard enn fremur.
Chelsea mætir Manchester United í 25. umferð ensku úrvalsdeildarinnar á Stamford Bridge, heimavelli Chelsea á morgun. Leikurinn hefst klukkan 16.00 og verður í beinni textalýsingu á mbl.is.