Rio Ferdinand, fyrrverandi fyrirliði Manchester United, er ánægður með nýjustu tíðindi af félaginu og telur það heillaspor að ráða José Mourinho sem knattspyrnustjóra félagsins. Ferdinand ritar stuttan pistil á facebook-síðu sína í tilefni þess að fregnir bárust af ráðningu Mourinho þar sem hann segir meðal annars:
„Til hamingju José með að hafa skrifað undir samning við stærsta félag heims. Þetta er stærsta og mest spennandi áskorun José Mourinho á knattspyrnustjóraferlinum. Hans fyrsta verkefni er að laða fram sigurhugarfar að nýju í félagið. Manchester United hefur nú ráðið sannan sigurvegara sem knattspyrnustjóra með ferilskrá sem sýnir fram á að þar er á ferð mikill sigurvegari,“ segir Ferdinand í facebook-færslu sinni.
„Ég hef heyrt fjölda fólks segja að stjórnunarstíll Mourinho sé ekki í samræmi við þann knattspyrnustíl sem Manchester United hefur verið þekkt fyrir í gegnum tíðina. Ég bendi þeim sem hafa slíkar efasemdir hins vegar á að liðið sem Mourinho mótaði hjá Chelsea fyrst þegar hann kom í ensku úrvalsdeildina var með hraða og áræðna kantmenn innanborðs, það er Duff og Robben. Chelsea lék á þeim tíma fótbolta sem stuðningsmenn Manchester United voru vanir að sjá liðið leika,“ segir Ferdinand enn fremur í pistli sínum.
Jose.. Signed.. Sealed.. Delivered! #Mourinho announced @ManUtd manager!! My thoughts - https://t.co/UYNsLR3W6H pic.twitter.com/MAVbSgKuqs
— Rio Ferdinand (@rioferdy5) May 26, 2016