José Mourinho, knattspyrnustjóri Manchester United, segir að sænski framherjinn Zlatan Ibrahimovic hafi þrátt fyrir skamma dvöl sína hjá félaginu strax haft mikil áhrif í leikmannhópi félagsins.
Zlatan mun að öllum líkindum leika sinn fyrsta leik fyrir Manchester United þegar liðið mætir Galatasaray í æfingaleik í Gautaborg í kvöld.
„Zlatan er með mikið sjálfstraust og hefur mikla trú á eigin hæfileikum á jákvæðan hátt. Hann er góður leikmaður í hópi þar sem hann er vinsamlegur við samherja sína og samskipti hans við þá sem spila með honum eru góð,“ sagði Mourinho í samtali við sjónvarpsstöð Manchester United.
„Zlatan er frábær leikmaður og við finnum það strax á þeim æfingum sem hann hefur tekið þátt í að hann tengir vel við leikmenn liðsins. Hann er mjög góður í að halda boltanum, koma öðrum leikmönnum inn í leikinn og er auk þess fæddur markaskorari,“ sagði Mourinho enn fremur um sænska framherjann í viðtalinu.