Antonio Conte, knattspyrnustjóri Chelsea á Englandi, er að ganga frá kaupum á spænska varnarmanninum Marcos Alonso ef marka má spænska blaðið MARCA.
Conte tók við Chelsea í sumar eftir að hafa stýrt ítalska landsliðinu síðustu tvö árin en honum hefur gengið illa að finna liðsauka í vörnina. Leonardo Bonucci, Georgio Chiellini og Daniele Rugani, leikmenn Juventus, hafa allir verið orðaðir við Chelsea en Juventus hefur engan áhuga á að selja þá.
Conte ætlar sér að fá Marcos Alonso, 25 ára gamlan varnarmann Fiorentina á Ítalíu, en hann mun kosta Chelsea um það bil 25 milljónir evra.
Alonso kom til Fiorentina á frjálsri sölu frá Bolton árið 2013 og hefur verið einn besti varnarmaður ítölsku deildarinnar síðustu ár.