Schweinsteiger gæti haldið kyrru fyrir

José Mourinho knattspyrnustjóri Manchester United segir vel koma til greina að þýski miðjumaðurinn Bastian Schweinsteiger haldi kyrru fyrir hjá liðinu og fari hvergi í janúarglugganum.

Schweinsteiger hefur átt erfitt uppdráttar hjá Manchester-liðinu en eftir að hafa verið utan hóps og meinað um tíma að æfa með aðalliðinu virðist vera að birta til hjá Þjóðverjanum. Hann fékk tækifæri í fyrsta sinn á leiktíðinni í fyrrakvöld þegar hann lék síðustu mínúturnar í 4:1 sigri United gegn West Ham í ensku deildabikarkeppninni.

„Hann getur hjálpað okkur og hann leggur hart að sér til að fá tækifæri,“ sagði Mourinho við fréttamenn í dag en Manchester United sækir Everton heim á sunnudaginn.

„Í sumar vorum við að reyna að fá eitthvað til gerast hjá Bastian og að hann væri eitthvað annað en hann ákvað að vera um kyrrt við erfiðar kringumstæður,“ sagði Mourinho.

• Blogga um frétt