Pep Guardiola, knattspyrnustjóri Manhester City, telur leikmannahóp félagsins innihalda frábæra leikmenn og velti þeirri spurningu upp í samtali við blaðamenn hvort hann væri nógu góður knattspyrnustjóri fyrir þennan frábæra leikmannahóp.
Manchester City hóf leiktíðina af miklum krafti og fór með sigur af hólmi í fyrstu 10 mótsleikjum liðsins undir stjórn Guardiola. Síðan þá hefur liðið skort stöðugleika og vandræðagangur í markvörslu og varnarleik liðsins hafa leitt til þess að liðið er 10 stigum frá Chelsea sem trónir á toppi deildarinnar.
„Það eru frábærir leikmenn í leikmannahópi Manchester City og ég ber mikla virðingu fyrir þeim leikmönnum sem eru í leikmannahópnum. Ég hef enga ástæðu til þess að efast um ágæti leikmanna minna og vandamálið gæti legið á öðrum vettvangi,“ sagði Guardiola á blaðamannafundi.
„Fólk veltir því fyrir sér hvort leikmennirnir séu nógu góðir til þess að leika undir minni stjórn, en ég velti á hinn bóginn fyrir mér hvort ég sé nógu góður fyrir þá. Við erum að tala um leikmenn í hæsta gæðaflokki sem hafa sýnt fram á það á undanförnum leiktíðum hvers megnugir þeir eru,“ sagði Guardiola enn fremur.