Jamie Carragher, fyrrverandi fyrirliði Liverpool og nú sparkspekingur á Sky, telur að dýrasti leikmaður félagsins þurfi að að missa nokkur kíló.
Leikmaðurinn sem Carragher á við er hollenski miðvörðurinn Virgil van Dijk sem Liverpool keypti frá Southampton í byrjun árs fyrir metfé en hann var keyptur á 75 milljónir punda.
Van Dijk skoraði sigurmarkið gegn Everton í bikarnum í sínum fyrsta leik með liðinu en hann þótti ekki sannfærandi í leikjunum þar á eftir og var svo settur á bekkinn í leiknum gegn Huddersfield í vikunni.
„Ég held að hann eigi eftir að sanna að þetta voru frábær kaup en hann hefur ekki alveg náð sér á strik. Ég tel að hann þurfi að komast í betra form og missa nokkur kíló. Kannski hefur það með að gera að hann náði ekki undirbúningstímabilinu,“ segir Carragher.
Það er stórleikur fram undan hjá Liverpool en liðið tekur á móti Tottenham í stórleik umferðarinnar á sunnudaginn. Ekki er víst að Van Dijk fái tækifæri í byrjunarliðinu en þeir Dejan Lovren og Joel Matel voru í miðvarðarstöðunum í 3:0 sigri Liverpool gegn Huddersfield í vikunni.