Lewis Hamilton hjá McLaren var í þessu að vinna ráspól japanska kappakstursins í Fuji. Fagnaði hann innilega en hann skaust úr fjórða sæti í það fyrsta á síðustu sekúndu tímatökunnar og var orðið um seinann fyrir keppi nauta hans að svara. Liðsfélagi hans Fernando Alonso varð annar.

Alonso hafði setið í efsta sæti alla þriðju tímatökulotuna en Hamilton fór ólíkt að og skipti um dekk öðru sinni er aðeins um tvær mínútur voru eftir. Komst því síðastur inn á tímahring áður en flaggið féll og við batnandi aðstæður vann hann sig fram úr Ferrariþórunum og Alonso á lokahringnum, var 70 þúsundustu úr sekúndu skemur með hringinn en heimsmeistarinn.

Hamilton lenti í vandræðum í fyrstu tímalotunni og var í 18. sæti þegar hann hafði aðeins eitt tækifæri til að bæta sig. Komst hann upp í fjórða sæti. Felipe Massa á Ferrari ók þá hraðast og Alonso varð annar. Hamilton setti svo besta tímann í annarri lotu, var 53 þúsundustu úr sekúndu á undan Alonso.

Er þetta í fimmta sinn á árinu sem ökuþórar McLaren hefja keppni á fremstu ráslínu í ár. Hamilton fagnaði ráspólnum gríðarlega í bíl sínum á innhringnum, enda gæti hann átt eftir að reynast mikilvægur vegna tvísýnnrar keppni þeirra Alonso um titil ökuþóra.

Ennfremur var honum eflaust mjög létt þó ekki væri nema fyrir það að komast fram úr báðum Ferrariþórunum sem voru á milli þeirra Alonso. Rúsínan í pylsuendann fyrir hann var þó að vinna sjálfan pólinn af Alonso sem er sálfræðilega mikilvægt í rimmu þeirra um titilinn.

Tímatökurnar fóru fram í rigningu og hafði skýjum létt það mikið að ekki kom til þess að fresta yrði þeim til fyrramáls. Æfingu fyrr í morgun varð hins vegar að aflýsa vegna aðstæðna þar sem ekki var hægt að senda sjúkraþyrlu á loft.

Kimi Räikkönen hjá Ferrari varð þriðji og liðsfélagi hans Felipe Massa fjórði. Höfðu þeir ekki roð við silfurörvum McLaren í lokalotunni.

Nico Rosberg hjá Williams átti góðan dag og varð sjötti. Vegna mótorskipta færist hann hins vegar aftur um 10 sæti á rásmarkinu. Fyrir vikið hefur Jenson Button hjá Honda keppni af sjötta rásstað. Hann náði besta árangri sínum í tímatökum í ár með sjöunda sæti og sannaði enn annálaða færni sína í rigningarakstri.

Vettel maður dagsins og Toro Rosso í fyrsta sinn meðal 10 fremstu

Sebastian Vettel hjá Toro Rosso var um margt maður dagsins, því við erfiðar aðstæður komst nýliðinn sá alla leið í þriðju lotu. Er það í fyrsta sinn í sögu Toro Rosso að bíll liðsins kemst svo langt í tímatökum. Hann varð sjöundi í fyrstu lotu og síðan níundi í þeirri þriðju og hefur keppni í áttunda sæti vegna afturfærslu Rosberg.

Renaultbílarnir áttu erfitt uppdráttar í bleytunni og þrátt fyrir batnandi tíma alla aðra lotuna urðu Giancarlo Fisichella og Heikki Kovalainen í aðeins 11. og 12. sæti.

Jarno Trulli hjá Toyota jafnaði sinn lélegasta árangur á árinu með 14. sæti en hann hefur komist í hóp 10 fremstu undanfarin níu mót. Liðsfélagi hans Ralf Schumacher átti afleitan dag. Setti tíma sem dugði í aðra lotu en gat þá ekkert ekið þar sem hann ók á Sakon Yamamoto á Spyker og skemmdi framvæng og fjöðrunarbúnað það mikið að ekki vannst tími til að gera við hann.

Í sjötta sinn á vertíðinni féllu Rubens Barrichello hjá Honda og Alexander Wurz hjá Williams úr leik í fyrstu lotu.

Niðurstaða tímatökunnar varð annars sem hér segir:

Aðstæður voru erfiðar í Fuji, hér yfirgefa áhorfendur stúkur er æfingu dagsins var aflýst. ap

Tengdar fréttir

Formúla-1/Keppnin um ráspólinn

Verstappen vann sprettinn

• Verstappen tók franska pólinn
• Leclerc aftur á ráspól
• Klessti sig á ráspólinn
• Bottas naumlega á ráspól

» Fleiri tengdar fréttir

• 1 blogg um fréttina

Bloggað um fréttina

• Gísli Foster Hjartarson: Hreint og beint....