Þótt Brawn-liðið sé í raun Hondaliðið fyrrverandi með nýju nafni telst það formlega vera nýtt lið í formúlu-1. Fyrir vikið telst árangur þess í tímatökunum marka tímamót.
Jenson Button vann ráspólinn í Melbourne í morgun og félagi hans Rubens Barrichello varð annar.
Fer þessi árangur á spjöld sögunnar, því nýliðar í formúlunni hafa ekki unnið ráspól í sínu fyrsta móti frá því kapplið Mercedes-Benz gerði það í franska kappakstrinum árið 1954, eða fyrir 55 árum.
Röð keppnisliða að tímatökunum loknum í dag var verulega frábrugðin því sem formúluunnendur upplifðu í fyrra. Helstu keppinautar Brawnliðsins voru Red Bull og Williams. Ferrari var aftarlega í lokalotunni og þangað komst hvorgur bíla McLaren sem hefja keppni í 14. og 15. sæti á morgun.