Kimi Räikkönen er ekki aðeins góður á formúlu-1 bílum og rallbílum, hann sýndi í síðustu viku að hann kann líka að keyra sláttuvélar - og það hratt.
Breska sjónvarpsstöðin Sky fékk Räikkönen til að þreyta keppni á sláttuvélum við formúluskýrendur sína þrjá, Martin Brundle, Johnny Herbret og Anthony Davidson, sem allir eru fyrrverandi keppendur í formúlu-1.
Davidson sagði eftir viðureignina að Räikkönen hlyti að eiga svona farartæki heima hjá sér, slíka færni hefði hann sýnt í akstrinum, eins og sjá má á meðfylgjandi myndbandi. Eftir kappaksturinn sat hann fyrir svörum hjá Brundle og þykir Räikkönen þar hafa verið óvenju skrafreifur.