Daniel Ricciardo hjá Red Bull er á því að Nico Rosberg verði heimsmeistari ökumanna í formúlu-1 í ár. Er það niðurstaða hans eftir að Rosberg endurheimti forystuna í stigakeppninni með þremur mótssigrum í röð.
Rosberg náði mikilli forystu snemma keppnistíðarinnar og var um tíma með 43 stigum meira í sarpi sínum en liðsfélaginn Lewis Hamilton. En breski heimsmeistarinn undanfarinna tveggja ára krafsaði í bakkan og sneri dæminu á endanum við og fór með 19 stiga forskot á Rosberg í sumarhléið í ágúst.
Sveiflurnar héldu áfram og Rosberg reis hratt úr öskustónni eftir hléið. Hefur hann unnið belgíska kappaksturinn, þann ítalska og loks í Singapúr, með þeim árangri að hann er nú með átta stigum fleira en Hamilton.
Ricciardo er í þriðja sæti í keppninni en hann telur að Rosberg sé með undirtökin í keppninni.