Lewis Hamilton hjá Mercedes var í þessu að vinna sigur í kanadíska kappakstrinum í Montreal. Þar í borg vann hann sinn fyrsta sigur í formúlu-1, árið 2007.
Sigurinn er sá sjötti sem Hamilton vinnur í Montreal og sá þriðji í röð. Liðsfélagi hans Valtteri Bottas varð annar en heilum 19,7 sekúndum á eftir og þriðji varðDaniel Ricciardo hjá Red Bull, en kappaksturinn er sá þriðji í röð sem hann hafnar í því sæti.
Niðurstaðan breytir stöðunni í stigakeppninni um bæði heimsmeistaratitil ökumanna og bílsmiða þar sem keppinautarnir Sebastian Vettel og Kimi Räikkönen hjá Ferrari urðu í fjórða og sjöunda sæti.
Vettel hóf keppni af öðrum rásstað en átti hrapallega ræsingu og féll niður í fjórða sæti fram að fyrstu beygju. Í henni braut Max Verstappen sneið af framvæng hans en Red Bull þórinn skaust eins og eldflaug úr fjórða sæti í annað á fyrstu metrunum.
Hamilton hóf keppni 25 stigum á eftir Vettel en eftir kappaksturinn hefur bilið minnkað í 12 stig, eða 141:129. Þá endurheimti Mercedes forystuna í keppni liðanna frá Ferrari en þar munar nú átta stigum, 222:214.
Heimamaðurinn Lance Stroll keppti í fyrsta sinn í Montreal og vann sín fyrstu stig í formúlu-1 með níunda sæti. Fernando Alonso var á öruggri ferð til stiga þar til vélin brást honum tveimur hringjum rúmum frá endamarki. Fyrir bragðið hefur McLaren ekki enn unnið stig í ár.
Sergio Perez og Esteban Ocon hjá Force India urðu í fimmta og sjötta sæti en líklegt er að eftirmál verði af akstri Perez sem þráfaldlega neitaði að hleypa liðsfélaga sínum fram úr, en franski ökumaðurinn virtist mun hraðskreiðari.