Eiður Smári: Skil ekki umræðu um áhugaleysi og metnaðarleysi

Eiður Smári Guðjohnsen sagði á blaðamannafundi í dag í tilefni af leik Íslendinga og Spánverja að honum leiddist sú umræða óskaplega þegar leikmenn íslenska landsliðsins væru sakaðir um áhuga- og metnaðarleysi og leggðu sig ekki fram.

Eftir Guðmund Hilmarsson
gummih@mbl.is

,,Öll þessi umræða um metnaðarleysi og áhugaleysi og að menn séu ekki að leggja sig fram er eitthvað sem ég skil ekki og hlusta ekki á það. Það er enginn okkar að ganga inn á völlinn sem ætlar ekki að leggja sig 100% fram. Ég lifi í þannig heimi að gagnrýnin hér heima á Íslandi er bara dropi í hafið miðað við þá gagnrýni sem ég hef fengið í gegnum ferilinn annars staðar á slæmum stundum og svo öfugt þegar vel gengur. Þetta er eitthvað sem ég get alveg lifað með og missi ekki svefn yfir," sagði Eiður Smári sem hefur leikinn á bekknum gegn Spánverjum annað kvöld.

,,Ég bara svo ánægður að vera kominn aftur af stað svo að vera á bekknum á morgun er bara næsta skrefið upp á við," sagði Eiður þegar hann var inntur eftir því hvernig legðist í hann að vera á varamannabekknum. ,,Það mun taka einhvern tíma að komast í form að nýju. Ég missti alveg af undirbúningstímabilinu og vantar leikæfingu. Aðalatriðið er að ég er nú heill heilsu og að hnéð haldi," sagði Eiður.

• 4 blogg um fréttina

Bloggað um fréttina

• Ómar Ingi: Hvað er ekki að skilja vinur !
• Gunnar Th. Gunnarsson: Furðulegt
• Pétur Björn Jónsson: Spennandi leikur
• Rúnar Haukur Ingimarsson: Skil bara ekki að Eiður skilji ekki umræðuna um áhugaleysi …