Cristiano Ronaldo kveðst vera alheill og ekkert eftir sig eftir að hafa spilað í 75 mínútur með Real Madríd gegn Bayern München í fyrri undanúrslitaleik liðanna í Meistaradeild Evrópu í knattspyrnu í gærkvöld.
Ronaldo hafði misst af síðustu fjórum leikjum Real vegna meiðsla í fæti og tvísýnt var um þátttöku hans gegn Bayern fram á síðustu stundu. Óttast var að teflt væri í tvísýnu með að láta hann spila í gærkvöld.
„Ég hafði smá áhyggjur því þetta var minn fyrsti leikur í þrjár vikur en ég fann ekkert fyrir því eftir leikinn. Ég verð í fullkomnu standi fyrir næstu leiki," sagði Ronaldo við Marca.
Real vann leikinn 1:0 en Ronaldo brenndi af úr dauðafæri í fyrri hálfleiknum og var ekki áberandi í leiknum. Seinni leikurinn fer fram í München næsta þriðjudagskvöld en Real mætir Osasuna í spænsku 1. deildinni á laugardagskvöldið.