Sara Björk Gunnarsdóttir og stöllur í Rosengård styrktu stöðu sína á toppi sænsku úrvalsdeildarinnar í knattspyrnu í kvöld með 2:1-sigri á Umeå. Sara bar að vanda fyrirliðabandið og lék allan leikinn.
Anja Mittag og Anita Asante skoruðu mörk Rosengård í fyrri hálfleik en Lina Hurtig minnkaði muninn sjö mínútum fyrir leikslok.
Hin brasilíska Marta, sem á árum áður lék með Umeå en gekk í sumar til liðs við Rosengård frá Tyresö, kom inná 20 mínútum fyrir leikslok í sínum fyrsta leik fyrir meistarana.
Rosengård er nú með þriggja stiga forskot á Örebro og mun betri markatölu, þegar 11 umferðum er lokið.