Barcelona tekur á móti Bayern München á morgun klukkan 18:45 í fyrri leik undanúrslita Meistaradeildar Evrópu. Liðin mættust einnig í undanúrslitunum árið 2013 þegar Bayern sýndi mikla yfirburði og vann 7:0 samanlagt. Bayern sigraði síðan Borussia Dortmund í úrslitum og var krýndur Evrópumeistari.
„Það var mjög sárt, en langt er liðið síðan þá. Við komum til leiks á annan hátt en síðast og þessi viðureign verður öðruvísi.“ sagði Lionel Messi, sem mun spila sinn 100. leik í Evrópu á morgun.
Pep Guardiola, þjálfari Bayern, stýrði Barcelona í fjögur ár þar sem hann vann þrjá deildartitla og tvo Evróputitla. Hann hefur orðið þýskur meistari í bæði ár sín við stjórnvölinn hjá Bayern en hann þurfti einnig að þola slæmt tap í Meistaradeildinni þegar Bayern tapaði 5:0 samanlagt fyrir Evrópumeistara Real Madríd í undanúrslitum síðasta árs.
„Hann var með okkur lengi og við vorum þeirrar heppni aðnjótandi að vinna marga titla og upplifa margt mikilvægt. Hann er þjálfari sem kynnir sér allt.“