Danny Blind, sem í dag var ráðinn landsliðsþjálfari Hollendinga í stað Guus Hiddink, segir aðal markmið sitt sé að tryggja Hollendingum sæti í úrslitakeppni Evrópumótsins í Frakklandi á næsta ári.
„Ég ásamt aðstoðarmönnum mínum og leikmönnum ætlum að vinna hörðum höndum að því að vinna okkur sæti á EM. Þetta er mitt eina markmið núna. Nú horfi ég ekki til baka heldur horfi fram á veginn, komast á Evrópumótið,“ segir Blind á vef hollenska knattspyrnusambandsins.
Fyrsti leikur Blind með hollenska landsliðið verður leikur gegn Íslendingum í undankeppni Evrópumótsins á Amsterdam Arena þann 3. september en Hollendingar eru í þriðja sæti riðilsins. Íslendingar tróna á toppi riðilsins með 15 stig, Tékkar hafa 13, Hollendingar, 10, Tyrkir 8, Lettar 3 og Kasakar reka lestina með 1 stig.
Blind hefur verið aðstoðarþjálfari Hiddink í undankeppninni en átti að taka við liðinu eftir Evrópumótið í Frakklandi á næsta ári.