Síle varð í kvöld Suður-Ameríkumeistari karla í knattspyrnu í fyrsta skipti með því að sigra Argentínu eftir vítaspyrnukeppni í úrslitaleiknum sem fram fór í Santiago í Síle.
Þetta var fimmti úrslitaleikur Sílebúa í keppninni en sá fyrsti frá árinu 1987. Argentína átti hinsvegar möguleika á að vinna keppnina í fimmtánda skipti og ná með því sigursælasta liðinu, Úrúgvæ.
Ekkert mark var skorað í venjulegum leiktíma eða í framlengingunni og þar með þurfti að grípa til vítaspyrnukeppni.
Matiaz Fernandes og Lionel Messi skoruðu í fyrstu umferðinni, 1:1.
Arturo Vidal skoraði fyrir Síle í 2. umferð en Gonzalo Higuaín skaut yfir mark Síle, 2:1.
Charles Aranguiz skoraði fyrir Síle í 3. umferð en Claudio Bravo varði frá Ever Banega og staðan var orðin 3:1.
Alexis Sánchez skoraði fyrir Síle í 4. umferð og tryggði liðinu meistaratitilinn, 4:1.