Landsliðsmaðurinn í knattspyrnu og leikmaður Molde í Noregi, Björn Bergmann Sigurðarson, er eftirsóttur í Rússlandi. Samkvæmt Vísi hefur rússneska úrvalsdeidarfélagið Rostov gert tilboð í Björn, en Molde hafnað tilboðinu. Viðræður milli félaganna standi enn og gæti náðst niðurstaða fljótlega.
Molde er í fjórða sæti deildarinnar með 31 stig að loknum 20 umferðum, en Björn Bergmann er næstmarkahæsti leikmaður deildarinnar með ellefu mörk. Björn Bergmann á að baki sjö landsleiki, en í þeim hefur hann skorað eitt mark.
Sverrir Ingi Ingason leikur með Rostov, en hann gekk til liðs við félagið frá Granada á Spáni fyrr á tímabilinu. Liðið er í þriðja sæti deildarinnar og hefur aðeins tapað einum leik það sem af er tímabilinu. Því gæti farið svo að Sverrir Ingi fengi nýjan liðsfélaga áður en langt um líður.