Inter Miami fór illa að sínu ráði í New York er liðið tapaði fyrir New York Red Bulls, 4:0, í bandarísku MLS-deildinni í fótbolta í gær.
Argentínski knattspyrnusnillingurinn Lionel Messi er að glíma við meiðsli og hefur ekki tekið þátt í undanförnum leikjum liðsins.
Þrátt fyrir það voru hinar stjörnur liðsins, Luis Suárez, Sergio Busquets og Jordi Alba allir með.
Liðið hefur nú tapað tveimur leikjum og unnið einn í fjarveru Messi en með Argentínumanninn í liðinu er það taplaust.