U21-árs landslið Danmerkur vann öruggan sigur á jafnöldrum sínum frá Litháen, 3:0, í I-riðli undankeppni EM 2025, riðli Íslands, í Vejle í kvöld.
Danmörk fór með sigrinum á topp riðilsins og er þar með 11 stig eftir fimm leiki, fimm stigum meira en Ísland í þriðja sæti, en íslenska liðið er búið að spila fjóra leiki.
William Osula, sóknarmaður Sheffield United, kom Dönum yfir eftir aðeins sjö mínútna leik í kvöld.
Oliver Sörensen, miðjumaður Midtjylland, tvöfaldaði forystuna skömmu fyrir leikhlé og skoraði svo annað mark sitt og þriðja mark Dana úr vítaspyrnu eftir tæplega klukkutíma leik.