Ásdís Hjálmsdóttir úr Ármanni varð þrefaldur Íslandsmeistari í frjálsíþróttum í dag en hún keppti í þremur greinum á Meistaramótinu á Þórsvellinum á Akureyri um helgina og vann þær allar.
Í gær sigraði Ásdís í aðalgrein sinni, spjótkastinu, og kastaði 55,60 metra. Í dag vann hún kringlukastið og kastaði þar 48,96 metra, og þrennunni náði Ásdís rétt í þessu þegar hún sigraði í kúluvarpi kvenna, þar sem hún kastaði 16,07 metra og setti mótsmet.
Ásdís er í lokaundirbúningi sínum fyrir Ólympíuleikana í Ríó þar sem hún er á meðal keppenda í spjótkasti.