Matthildur Óskarsdóttir vann bronsverðlaun í telpnaflokki á heimsmeistaramótinu í bekkpressu í Texas í Bandaríkjunum í gær.
„Ég er bara mjög glöð og sátt,“ segir hún um árangurinn.
Matthildur, sem er sautján ára, setti einnig Íslandsmet í sínum aldurs- og þyngdarflokki með því að lyfta 80 kílógrömmum á mótinu. Bandarísk stúlka vann gullið með því að lyfta 102,5 kílóum og þýsk stúlka silfrið með lyftu upp á 87,5 kíló.
Aðspurð segir Matthildur, sem keppir í undir 18 ára flokki, að árangurinn hafi ekki komið sér á óvart því hún hafi sett stefnuna á verðlaunasæti. „Ég ætlaði mér að gera aðeins meira en ég veiktist viku fyrir mót og borðaði ekkert vel,“ segir hún en þar að auki tognaði hún lítillega í bakinu.
Matthildur fékk ælupest áður en hún fór til Texas og veiktist svo aftur á leiðinni út. Talið er að um matareitrun hafi verið að ræða.
Spurð hversu lengi hún hafi æft fyrir mótið segist hún hafa farið í aðgerð á ökkla síðasta sumar og byrjaði því ekki að æfa fyrr en í ágúst.
Fram undan hjá Matthildi er þátttaka á HM í þrílyftu sem verður haldið í Hvíta-Rússlandi í júní. Þar keppir hún í bekkpressu, hnébeygju og réttstöðulyftu.
„Ég stefni á að setja ný Íslandsmet og á persónulega bætingu. Ef eitthvert sæti kemur líka verður það skemmtilegt en þetta er rosalega sterkur flokkur sem ég er í og margir keppendur.“
Þess má geta að Matthildur er dóttir Evu Maríu Jónsdóttur fjölmiðlakonu og Óskars Jónassonar kvikmyndagerðarmanns og var Eva María með henni í Texas meðan á mótinu stóð.