Matias Messi, eldri bróðir fótboltakappans Lionel Messi, var í dag úrskurðaður í stofufangelsi fyrir vopnaeign, að því AFP-fréttastofan hefur eftir saksóknara í Argentínu.
Til stendur að útskrifa Messi, sem er 35 ára, af sjúkrahúsi í dag og verður honum þá gert að sæta stofufangelsi á heimili sínu í Rosario, sem er um 300 km norður af höfuðborginni Buenos Aires.
Messi hefur dvalið á sjúkrahúsi frá því í lok síðasta mánaðar, eftir að hann fannst með meiðsl á andlitið á reki í blóðdrifnum hraðbát eftir árekstur við sandrif. Var hann handtekinn vegna vopna sem fundust um borð í bátinum.
Þetta er í annað skipti sem Messi hinn eldri er handtekinn fyrir vopnaeign, en viðurlög við brotinu varða á bilinu þriggja og hálfs og átta ára fangelsisdóms.
Lögfræðingur Messi fjölskyldunnar, Ignacio Carbone, sagði við fjölmiðla að Messi væri góður maður og að hann „sé ekki að fara að flýja“.