Birgir Leifur Hafþórsson lék á einu höggi undir pari á þriðja keppnisdeginum á opna Madeira meistaramótinu í golfi en hann lauk keppni nú á öðrum tímanum. Birgir Leifur er þar með á einu höggi undir pari í heildina, hefur samtals leikið á 215 höggum. Hann er sem stendur í 21. sæti af 67 keppendum sem komust áfram eftir tvo fyrstu dagana en margir eiga eftir að ljúka keppni í dag.
Birgir Leifur hóf keppni á 10. braut og fékk fugl á tveimur fyrstu holunum, skolla á þeirri fimmtu en paraði hinar sex holurnar í fyrri hlutanum. Samtals fékk hann fjóra fugla og þrjá skolla í dag og paraði hinar ellefu holurnar.
Fjórði og síðasti keppnisdagurinn á portúgölsku eyjunni er á morgun.