Ólafía Þórunn Kristinsdóttir úr Golfklúbbi Reykjavíkur og Birgir Leifur Hafþórsson úr Golfklúbbi Kópavogs og Garðabæjar voru valin kylfingar ársins hjá GSÍ árið 2014. Ólafía og Birgir urðu bæði Íslandsmeistarar í golfi í sumar og komust bæði á lokastigið í úrtökumótunum fyrir Evrópumótaröðina.
Í umsögn um valið kom fram að eftirfarandi:
Birgir Leifur Hafþórsson, GKG:
Íslandsmeistari i höggleik karla og komst á lokaúrtökumótið fyrir Evrópsku mótaröðina. Birgir Leifur hefur verið í fremstu röð íslenskra kylfinga um árabil og var eini íslenski kylfingurinn sem náði alla leið í lokaúrtökumótið fyrir Evrópsku mótaröðina.
Ólafía Þórunn Kristinsdóttir, GR:
Íslandsmeistari í höggleik kvenna og var lykilmaður í landsliði Íslands sem keppti á Heimsmeistaramótinu í Japan þar sem Ísland náði besta árangri kvennaliðs frá upphafi. Ólafía komst á lokaúrtökumótið fyrir Evrópsku mótaröð kvenna.