Ólafía Þórunn Kristinsdóttir, atvinnukylfingur á LPGA-mótaröðinni í golfi, verður með í Einvíginu á Nesinu sem haldið verður í 21. sinn á Nesvellinum á mánudaginn næstkomandi. Þetta kom fram í dag í fréttatilkynningu frá Nesklúbbinum.
Búast má við skemmtilegri keppni en Valdís Þóra Jónsdóttir, atvinnukylfingur á Evrópumótaröðinni verður einnig á meðal þátttakenda.
Mótið er árlegt góðgerðarmót Nesklúbbsins og DHL Express á Íslandi, en 10 af bestu kylfingum landsins fyrr og síðar er boðið til leiks. Kylfingarnir leika í ár í þágu Vinaliðaverkefnisins sem stendur fyrir að stöðva einelti í skólum.
Mótið verður með hefðbundnu sniði, en kl. 10 leika keppendur níu holu höggleik og kl. 13 hefst Einvígið sjálft. Einvígið er með „shoot-out“ fyrirkomulagi þar sem sá kylfingur sem leikur á flestum höggum dettur út á hverri holu. Síðustu tveir kylfingarnir berjast svo um sigurinn á 18. holu.
DHL gefur Vinaliðaverkefninu eina milljón króna, en fyrirtækið hefur verið styrktaraðili mótsins frá því það var haldið fyrst fyrir 20 árum síðan.
Þátttakendur 2017:
Birgir Björn Magnússon GK Klúbbmeistari GK 2017
Björgvin Sigurbergsson GK Margfaldur Íslandsmeistari í golfi
Björgvin Þorsteinsson GA Íslandsmeistari 35 ára og eldri 2017
Guðmundur Rúnar Hallgrímsson GS Klúbbmeistari GS 2017
Ingvar Andri Magnússon GR Íslandsmeistari 17-18 ára 2017
Kristján Þór Einarsson GM Klúbbmeistari GM 2017
Oddur Óli Jónasson NK Klúbbmeistari NK 2017 og sigurvegari Einvígisins 2016
Ragnhildur Kristinsdóttir GR Landsliðskona og meðlimur í TEAM ICELAND
Úlfar Jónsson GKG Margfaldur Íslandsmeistari í golfi
Valdís Þóra Jónsdóttir GL Íslandsmeistari 2017 og atvinnukylfingur
Ólafía Þórunn Kristinsdóttir, GR - atvinnukylfingur