Þýska landsliðið í handknattleik karla verður í sjötta og neðsta styrkleikaflokki þegar dregið verður í riðla í lokakeppni heimsmeistaramótsins í Doha sunnudaginn 20. júlí.
Þýska landsliðið verður semsagt í sama styrkleikaflokki og ástralska landsliðið hefði verið en sem kunnugt er ákvað yfirstjórn Alþjóða handknattleikssambandsins að afturkalla keppnisleyfi Ástrala í vikunni og bjóða Þjóðverjum keppnisrétt á HM í staðinn.
Lærisveinar Guðmundar Þórðar Guðmundssonar í danska landsliðinu verða í fyrsta styrkleikaflokki og Patrekur Jóhannesson og hans menn í austurríska landsliðinu verða í þriðja styrkleikaflokki. Þeir geta dregist saman í riðil með þýska landsliðinu, svo dæmi sé tekið.
Styrkleikaflokkur 1: Spánn (heimsmeistarar), Frakkland (Evrópumeistarar), Danmörk, Króatía.
Styrkleikaflokkur 2: Bosnía og Hersegóvína, Pólland, Svíþjóð, Slóvenía.
Styrkleikaflokkur 3: Rússland, Katar, Makedónía, Alsír.
Styrkleikaflokkur 4: Austurríki, Argentína, Hvíta-Rússland, Tékkland.
Styrkleikaflokkur 5: Túnis, Egyptaland, Brasilía, Barein.
Styrkleikaflokkur 6: Íran, Sameinuðu-arabísku furstadæmin, Síle, Þýskaland.
Liðin verða dregin saman í fjóra sex liða riðla. Að riðlakeppninni lokinni halda fjögur efstu lið hvers riðils áfram keppni um heimsmeistaratitilinn en þau átta sem eftir verða taka þátt í keppninni um hinn sígilda forsetabikar sem fyrst var keppt um á HM í Þýskalandi 2007.