Guðjón Valur Sigurðsson, landsliðsfyrirliði í handbolta, bætti í dag skrautfjöður í hatt sinn þegar hann varð spænskur deildarbikarmeistari með Barcelona.
Barcelona vann stórsigur á BM Grannollers í úrslitaleiknum í dag 37:26. Barca vann Naturhouse La Rioja í undanúrslitum í gær 35:25.
Frakkinn Nikola Karabatic var valinn maður úrslitaleiksins en hann skoraði 7 mörk eins og Rutenka. Fyrirliðinn Victor Tomas var með 6 mörk og Guðjón Valur kom næstur með 5 mörk.
Keppnin er kölluð Copa Asobal og þar fá fjögur efstu liðin í deildinni þátttökurétt þegar deildin er hálfnuð og útkljá bikarkeppnina á tveimur dögum. Keppnin hefur verið haldin frá árinu 1991 og er þetta fjórða árið í röð sem Barcelona fagnar sigri.