Alfreð sáttur við Szeged

„Ég er ánægður með þessa niðurstöðu,“ sagði Alfreð Gíslason, þjálfari þýska meistaraliðsins THW Kiel, við Mogunblaðið í gær eftir að dregið var til átta liða úrslita í Meistaradeild Evrópu í handknattleik. Kiel, sem vann Evrópumeistara Flensburg í 16-liða úrslitum, dróst gegn ungverska liðinu Pick Szeged sem ruddi Rhein-Neckar Löwen, næstefsta liði þýsku 1. deildarinnar, úr vegi í 16-liða úrslitum.

„Liðin fjögur sem við gátum mætt eru öll erfið. Það er kostur að eiga seinni leikinn á heimavelli,“ sagði Alfreð sem hafði spáð því að Kiel mætti franska liðinu PSG, sem Róbert Gunnarsson leikur með. „Ég hef verið nokkuð getspakur fram til þess og oftar en ekki giskað á rétt þegar komið hefur að drætti í Meistaradeildinni. En ég hitti ekki á það að þessu sinni,“ sagði Alfreð léttur í bragði. „PSG var sterkasta liðið á pappírunum úr neðri styrkleikaflokknum.“

Alfreð er ánægður með lið sitt um þessar mundir, ekki síst eftir að það sló út Flensburg í 16-liða úrslitunum en Flensburg vann Kiel í úrslitaleik Meistaradeildarinnar í Köln í fyrravor.

„Við spiluðum frábærlega í Flensburg,“ segir Alfreð um fyrri viðureignina sem Kiel vann með níu marka mun, 30:21. „Liðið gerði vel í að halda einbeitingu í síðari viðureigninni á heimavelli okkar á sunnudaginn eftir sigurinn stóra í Flensburg,“ sagði Alfreð ennfremur en Kiel vann á heimavelli, 33:28. „Við áttum svo sem möguleika á að vinna með meiri mun.“

Nánar er rætt við Alfreð og farið um leikina í átta liða úrslitum Meistaradeildarinnar og í átta liða úrslitum EHF-keppninnar í íþróttablaði Morgunblaðsins sem kom út í morgun.