„Ólafur Guðmundsson kom, sá og sigraði.“ Svona hljómar fyrirsögn Kristianstadsbladet eftir endurkomu Ólafs Guðmundssonar með liði Kristianstad í 33:27-sigri á Sävehof í sænsku úrvalsdeildinni í handknattleik í dag.
Ólafur skoraði sex mörk og var næstmarkahæstur í leiknum, sem var hans fyrsti eftir að hann sneri aftur til Kristianstad frá Hannover í Þýskalandi. Ólafur var afar fljótur að stimpla sig aftur inn í sænska liðið, en hann kom inná í stöðunni 8:4 og skoraði fljótlega þrjú mörk í röð, og kom Kristianstad í 12:6.
Ólafur var næstmarkahæstur í sínu liði í leiknum, frammi fyrir 4.711 áhorfendum í Kristianstad.
Kristianstad hefur unnið alla tólf leiki sína til þessa í deildinni og er með þriggja stiga forskot á Alingsås. Sävehof, með Atla Ævar Ingólfsson innanborðs, er í 3. sæti með 19 stig.