„Fékk algjöra gæsahúð“

Það var líkt og Ólafur Guðmundsson hefði skrifað handritið sjálfur að sínum fyrsta leik með Kristianstad í sænsku úrvalsdeildinni í handknattleik, eftir endurkomuna frá Hannover-Burgdorf í Þýskalandi. Hátt í 5.000 áhorfendur í Kristianstad stóðu og klöppuðu þegar Ólafur var kynntur til leiks, fyrir stórleikinn við Sävehof í gær, og hann var svo næstmarkahæstur í sínu liði með 6 mörk í 33:27-sigri.

„Þetta var ótrúlegt. Ég fékk algjöra gæsahúð,“ sagði Ólafur um viðtökurnar sem hann fékk. Hann var ánægður með sinn leik: „Ég hef ekki æft neitt að ráði með liðinu og það eru nýir leikmenn hérna, en það var gaman að fá að spila og skora nokkur mörk,“ sagði Ólafur.