Handknattleiksmaðurinn Ólafur Gústafsson virðist vera á leiðinni inn á beinu brautina eftir langvarandi og erfið meiðsli á báðum hnjám sem hafa haldið honum frá keppni frá haustinu 2014.
„Ég er farinn að hlaupa mjög rólega þannig að það er jákvætt. Ég vinn mig hægt og rólega áfram í áttina að handboltavellinum. Einnig er ég að lyfta eftir æfingaáætlun frá Ella sjúkraþjálfara [Elís Þór Rafnsson] sem hefur hjálpað mér mikið. Það eru ljósir punktar í stöðunni,“ sagði Ólafur við Morgunblaðið í gær en hann er samningsbundinn Aalborg Håndbold fram á mitt þetta ár.