Guðmundur Guðmundsson, fráfarandi landsliðsþjálfari Dana í handknattleik, hefur verið sæmdur riddarakrossi dönsku Dannebrogsorðunnar en Rúv greinir frá þessu í dag.
Líkja má krossinum við hina íslensku fálkaorðu og er þetta því mjög mikill heiður fyrir Guðmund. Guðmundur fær krossinn fyrir að gera Dani að ólympíumeisturum í fyrra.
„Ég fékk þetta afhent núna fyrir tæpri viku síðan. Auðvitað er þetta mikill heiður og ég er þakklátur fyrir þetta,“ sagði Guðmundur í samtali við Rúv.
Guðmundur er vel kunnugur því að fá verðlaun sem þessi. Er Ísland hafnaði í 2. sæti á Ólympíuleikunum í Peking árið 2008 fékk hann stórriddarakross hinnar íslensku fálkaorðu.