Hafnarfjörður hefur verið endalaus uppspretta af góðu handboltafólki í gegnum tíðina og viðureignir FH og Hauka eru nánast undantekningarlaust frábær skemmtun. Sú varð einnig raunin að Ásvöllum í gær, þegar FH steig risastórt skref í átt að deildarmeistaratitlinum með sætum sigri 30:28.
FH dugir því jafntefli á heimavelli gegn Selfossi í lokaleik sínum, til að verða deildarmeistari og um leið að tryggja sér heimavallarétt alla úrslitakeppnina. FH er með lið sem verðskuldar að vera með níu fingur á bikarnum. Leikmenn berjast hver fyrir annan allan leikinn og það eru nokkrir spaðaásar í spilastokknum hjá þjálfaranum, Halldóri Jóhanni Sigfússyni. Einn slíkur er Ásbjörn Friðriksson, sem fór á kostum í fyrri hálfleik og skoraði mörk í öllum regnbogans litum. Eðlilega dró af kappanum í seinni hálfleik en þessi snjalli leikmaður er að koma til baka eftir meiðsli.
Sjá allt um magnaða umferð í Olís-deildinni í handbolta í gær í íþróttablaði Morgunblaðsins í dag