Handknattleiksmaðurinn efnilegi Elvar Örn Jónsson hefur gert nýjan samning við Selfyssinga um að spila áfram með þeim næstu tvö árin. Þetta kemur fram í fréttatilkynningu frá handknattleiksdeild Selfoss.
Elvar var í lykilhlutverki hjá Selfyssingum í Olís-deild karla á síðasta tímabili en þeir voru þá nýliðar í deildinni og höfnuðu í fimmta sæti. Elvar var markahæsti leikmaður liðsins með 166 mörk í 27 leikjum og var í hópi markahæstu leikmanna deildarinnar.
Hann er fastamaður í U21 landsliði Íslands sem hefur leik á HM í Alsír á þriðjudag og hefur að auki verið valinn til æfinga með A-landsliði Íslands.