Guðmundur Hólmar Helgason, landsliðsmaður í handknattleik, sneri aftur á völlinn með liði sínu Cesson-Rennes í gærkvöldi eftir að hafa verið frá vegna meiðsla síðasta hálfa árið.
Guðmundur Hólmar meiddist á æfingu með Cesson-Rennes í febrúar og sleit tvö liðbönd í ökkla, en hann missteig sig í hraðaupphlaupi á æfingunni.
Cesson-Rennes tapaði naumlega í fyrstu umferð frönsku 1. deildarinnar fyrir Saran í gærkvöld, 30:29, og fékk Guðmundur þar sínar fyrstu mínútur eftir meiðslin. Hann skoraði ekki en Geir Guðmundsson, frændi hans og liðsfélagi, skoraði eitt mark.