Lærisveinar Guðmundar Guðmundssonar í danska landsliðinu í handbolta, áttu ekki í miklum vandræðum með að vinna Egypta á HM í Frakklandi í dag. Danir skoruðu 35 mörk gegn 28 hjá Egyptum.
Danir voru komnir í 10:5 í fyrri hálfleik og vissu þá allir í hvað stemmdi. Danir gáfu Egyptum aldrei möguleika og var sigurinn þægilegur.
Danska liðið er ógnarsterkt er kemur það mjög á óvart ef þeir berjast ekki um verðlaun í lok móts.
12 leikmenn komust á blað í danska liðinu og skoraði Lasse Svan mest þeirra eða sex mörk á meðan Casper Mortensen skoraði fimm. Yehia Elderaa skoraði sex fyrir Egypta.
Danir unnu Argentínumenn í fyrsta leik sínum og hafa því unnið báða leiki sína til þessa á mótinu. Næsti leikur Dana er stórleikur gegn Svíum, sem Kristján Andrésson þjálfar, á mánudag.