Esja sigraði Björninn, 6:2, í fyrsta leik tímabilsins í Hertz-deild karla í íshokkí í Skautahöllinni í Laugardal í kvöld.
Fyrirfram var búist við hörkuleik þar sem bæði lið hafa verið að styrkja sig að undanförnu en þau stefna bæði á að vera í toppbaráttunni í vetur.
Heimamenn í Esju lögðu grunninn að sigrinum með góðum leik í fyrsta leikhluta en þeir skoruðu þrjú mörk í honum gegn einu marki gestanna.
Liðin skoruðu sitt hvort markið í öðrum leikhluta. Heimamenn spýttu aftur í lófana í síðasta leikhlutanum, unnu hann 2:0 og leikinn 6:2.
Sturla Snorrason skoraði tvö marka Esju og þeir Björn Sigurðarson, Snorri Sigurbjörnsson, Egill Þormóðsson og Steindór Ingason gerðu sitt markið hver. Hjalti Jóhannsson og Andri Helgason skoruðu mörk gestanna.