Stúlkurnar í U18 ára landsliði Íslands í körfuknattleik töpuðu fyrir Bosníu, 82:67, í leiknum um bronsverðlaunin í B-deild Evrópumótsins í Sarajevo í Bosníu. Leikurinn var einnig hreinn úrslitaleikur um sæti í A-deildinni.
Íslensku stelpurnar byrjuðu leikinn betur og höfðu sex stiga forystu að loknum fyrsta leikhluta. Heimastúlkur höfðu hins vegar mikla yfirburði í öðrum leikhluta og voru með tólf stiga forystu, 48:36, að loknum fyrri hálfleik.
Seinni hálfleikur varð ekki spennandi og fór það svo að lokum að heimastúlkur lönduðu 15 stiga sigri.
Thelma Dís Ágústsdóttir var stigahæst í íslenska liðinu með 16 stig og Sylvía Rún Hálfdanardóttir skoraði 12 stig.