Ísland valtaði yfir Svía og komst áfram

Íslenska landsliðið í körfuknattleik skipað leikmönnum 20 ára og yngri fór ansi illa með það sænska í 16-liða úrslitum á Evrópumótinu í Grikklandi í dag og vann ótrúlegan 73:39 sigur. Ísland mætir Ítalíu eða Ísrael í átta liða úrslitum á morgun. 

Sænska liðið byrjaði töluvert betur og komst fljótlega í 14:2. Ísland skoraði hins vegar 16 af næstu 20 stigum leiksins og var staðan því 18:16, Íslandi í vil, eftir fyrsta leikhluta. Eftir það hafði íslenska liðið algjöra yfirburði og bætti jafnt og þétt í forskotið. 

Að lokum munaði 34 stigum á liðunum. Kári Jónsson er búinn að jafna sig á meiðslum sem hann varð fyrir gegn Tyrkjum og var hann stigahæstur í íslenska liðinu með 15 stig. Tryggvi Snær Hlinason skoraði 13 stig og tók auk þess tólf fráköst. Kristinn Pálsson og Breki Gylfason skoruðu tíu stig hvor. 

• Blogga um frétt